මනුෂ්‍ය, දිව්‍ය, බ්‍රහ්ම ආදී ලෞකික සැප සම්පත් බලාපොරොත්තුවෙන් කරන කුසල් සසර දීර්ඝ වීමට හේතු වේ. රහත් බව, පසේබුදු බව, ලොව්තුරා බුදුබව යන තුන්තරා බෝධිය පිණිස කරන කුසල් නිවන් ලබා ගැනීමට උපකාර වේ. මෙසේ තුන්තරා බෝධිය පිණිස කරන කුසල් පාරමිතා නම් වේ. උපෝසත සිල් සමාදන් වන දිනයෙහි පහත සඳහන් පරිදි, නුවණින් ක්‍රියා කිරිමෙන් පාරමිතා දහයම පිරිය හැකි වේ.
- මල් පූජා, පහන් පූජා, ගිලන් පස පූජා, ආහාර පූජා, දන් පිරිණැමීම, දහම් දෙසීම, ධර්ම දේශනා වලට උපකාර වීම ආදී කටයුතු වලින් දාන පාරමිතාව පිරේ.
- සිල් සමාදන් වී සීලය හොඳින් රැක ගැනීමෙන් සීල පාරමිතාව පිරේ.
- අඹුදරුවන් නෑදෑ හිතවතුන්ගෙන් වෙන් ව, අලංකාර වස්ත්‍රාභරණ අතහැර, රාත්‍රී අහාරය අතහැර, නැටුම්, ගැයුම්, වැයුම්, විහිළු දැකීම් ආදිය අතහැර, සැප සහිත ආසන, ඇඳවල් අතහැර, කාමයන් ගෙන් වෙන් දවස ගත කිරීමෙන් නෛෂ්ක්‍රම්‍ය පාරමිතාව පිරේ.
- ප්‍රඥාව වැඩීමේ අරමුණින් දහම් ඇසීම, දහම් දෙසීම, ධර්ම සාකච්චා කිරීම, බණ පොත් කියවීම, භාවනා කිරීම ආදියෙන් ප්‍රඥා පාරමිතාව පිරේ.
- උත්සාහයෙන් යුතුව සිල් රැකීම, ධුතාංග රැකීම, භාවනා කිරීම, වත් පිළිවෙත් කිරීම, බණ ඇසීම ආදියෙන් වීර්යය පාරමිතාව පිරේ.
- සිල් සමාදන් වී කුසගින්න ඉවසීම, ශාරීරික වේදනා ඉවසීම, මැසිමදුරු කරදර ඉවසීම, ශීතෝෂ්ණ ඉවසීම, බැණුම් නින්දා අපහස ඉවසීම ආදයෙන් ක්ෂාන්ති පාරමිතාව පිරේ.
- සත්‍ය භාවිතයෙන් හා සත්‍යයෙහිම පිහිටා සිටීමෙන් සත්‍යය පාරමිතාව පිරේ.
- සිල් රැකීම සඳහා වෙන් කරගත් කාලයෙහි නොකඩවා සිල් රැකීම, භාවනා සඳහා වෙන් කරගත් කාලයෙහි නොකඩවා භාවනා කිරීම ආදී කටයුතු වලදී අධිෂ්ඨාන පාරමිතාව පිරේ.
- අනුන්ගේ යහපත පිණිස ඇමදීම, කසල ඉවත් කිරීම, පැන් සපයා තැබීම, පහන් දල්වා තැබීම ආදී මෛත්‍රී සහගත ක්‍රියා කිරීම, අනුන්ගේ සිත සතුටු වන පරිදි යහපත් වචන කථා කිරීම, අනුන්ගේ යහපත පිණිස ධර්මය කියා දීම, මෛත්‍රී භාවනා කිරීම ආදයෙන් මෛත්‍රී පාරමිතාව පිරේ.
- ප්‍රියමනාප හෝ වැදගත් පුද්ගලයින්ට විශේෂයෙන් ඇලුම් නොකොට, අප්‍රිය හෝ අහිතවත් පුද්ගලයින්ට අකමැත්තක් ද නොදක්වමින්, තමන් කැමති දේවල් කෙරෙහි ඇල්මක් නැතිව, අකමැති දේවල් කෙරෙහි ගැටීමක් ද නැතිව, මධ්‍යස්ත සිතින් කටයුතු කිරීමෙන් උපේක්ෂා පාරමිතාව පිරේ.
[පූජ්‍ය රේරුකානේ චන්දවිමල නාහිමි, පොහොය දිනය – p151 – p153]
Further reading (download link):
පූජ්‍ය රේරුකානේ චන්දවිමල නාහිමි, පොහොය දිනය
daham karunu 