1. සුපටිපන්නෝ භගවතෝ සාවක සංඟෝ
භාග්‍යවතුන් වහන්සේගේ ශ්‍රාවක සංඝයා අධිශීල, අධිචිත්ත, අධිප්‍රඥාවෙන් යුක්ත වූ සුන්දර ප්‍රතිපත්තියකට (ආර්ය අෂ්ටාංගික මාර්ගයට) පිළිපන් බැවින් සුපටිපන්න නම් වන සේක.
2. උජුපටිපන්නෝ භගවතෝ සාවක සංඟෝ
භාග්‍යවතුන් වහන්සේගේ ශ්‍රාවක සංඝයා අධිශීල, අධිචිත්ත, අධිප්‍රඥාවෙන් යුක්ත වූ, ඍජු ප්‍රතිපත්තියක් අනුගමනය කරන බැවින් උජුපටිපන්න නම් වන සේක.
3. ඤායපටිපන්නෝ භගවතෝ සාවක සංඟෝ
භාග්‍යවතුන් වහන්සේගේ ශ්‍රාවක සංඝයා අධිශීල, අධිචිත්ත, අධිප්‍රඥාවෙන් යුක්ත වූ, නිවන් දක්නා වූ ප්‍රතිපත්තියකට පිළිපන් බැවින් ඤායපටිපන්න නම් වන සේක.
4. සාමීචිපටිපන්නෝ භගවතෝ සාවක සංඟෝ
භාග්‍යවතුන් වහන්සේගේ ශ්‍රාවක සංඝයා අධිශීල, අධිචිත්ත, අධිප්‍රඥාවෙන් යුක්ත වූ, ගරු කළ යුතු ප්‍රතිපත්තියකට පිළිපන් බැවින් සාමීචිපටිපන්න නම් වන සේක.
5. යදිදං චත්තාරි පුරිසයුගානි අට්ඨපුරිසපුග්ගලා ඒස භගවතෝ සාවක සංඟෝ ආහුනෙයියෝ
යුගල වශයෙන් සතරක් හා පුද්ගලයින් වශයෙන් අට දෙනෙක් වන (සෝවාන් මාර්ගයට පිවිසි හා සෝවාන් ඵල සහිත, සකෘදාගාමි මාර්ගයට පිවිසි හා සකෘදාගාමි ඵල සහිත, අනාගාමි මාර්ගයට පිවිසි හා අනාගාමි ඵල සහිත, අරහත් මාර්ගයට පිවිසි හා අරහත් ඵල සහිත) භාග්‍යවතුන් වහන්සේගේ ශ්‍රාවක සංඝයා, ඉතා දුර සිට ගෙනෙන ලද සිව්පසේ පිළිගැනීමට සුදුසු බැවින් ආහුනෙයිය නම් වන සේක.
6. පාහුනෙයියෝ
තමා සතු ප්‍රණීත දෙයින් සංග්‍රහ, සත්කාර, පූජා කිරීමට සුදුසු බැවින් ද, ඉතා දුර බැහැර සිට පැමිණෙන ඥාතීන් සඳහා පිළියෙල කරන ලද ආහාර පානයන් පිළිගැනීමට සුදුසු බැවින් ද, පාහුනෙයිය නම් වන සේක.
7. දක්ඛිනෙයීයෝ
මෙලොව පරලොව සැපවත් වීම උදෙසා කරන සියළු පූජාවන් පිළිගැනීමට සුදුසු බැවින් ද, දීමෙහි ආනිසංස මහත් පල මහානිසංස කිරීමෙහි සමත් වන බැවින් ද, දක්ඛිනෙයිය නම් වන සේක.
8. අන්ජලිකරණෙයියෝ
ලෝකයා විසින් ඇඟිලි බැඳ, දොහොත් මුදුනෙහි තබා වන්දනාවට, ගරු සත්කාරයට සුදුසු බැවින් අන්ජලිකරණෙයිය නම් වන සේක.
9. අනුත්තරං පුඤ්ඤංඛෙත්තං ලෝකස්සාති
ලෝකයා හට පින් කෙතක් (පුණ්‍යක්‍ෂේත්‍රයක්) වන බැවින් අනුත්තරං පුන්‍යක් කෙත්තං නම් වන සේක.
daham karunu 